კახეთის რეგიონში 160 მილიონ ლარზე მეტი ღირებულების 990-მდე პროექტი განხორციელდა
27 დეკემბერი 2022,,შედგა შემაჯამებელი შეხვედრები კახეთის რეგიონის ყველა მუნიციპალიტეტში. წელს, ინფრასტრუქტურულ პროექტებში, კახეთის რვავე მუნიციპალიტეტში ინვესტირებული იყო, დაახლოებით, 160 მილიონი ლარი, შესრულდა 990 პროექტი. წლის განმავლობაში კახეთის რეგიონში დაიგო 115 კილომეტრი გზა. ასევე, აღსანიშნავია სპორტული ინფრასტრუქტურა, სადაც რეაბილიტაცია ჩაუტარდა, დაახლოებით, 100 ობიექტს, ზოგიერთ შემთხვევაში - აშენდა ახალი შენობები. აშენდა 70 ახალი ფეხბურთის მინი სტადიონი, 60-მდე ბაღს ჩაუტარდა რეაბილიტაცია, რამდენიმე აშენდა კიდეც. ხაზგასასმელია, რომ მცირე სარეაბილიტაციო სამუშაოები ჩატარდა 18 სკოლაში“-განაცხადა რეგიონული განვითარებისა და ინფრასტრუქტურის მინისტრის მოადგილემ ილია ბეგიაშვილმა კახეთის რეგიონში ინფრასტრუქტურული პროექტების დათვალიერების შემდეგ.
კახეთის რეგიონისათვის 2022 წელი მასშტაბური იყო როგორც პროექტების რაოდენობის, ისე ბიუჯეტის მხრივ. რეგიონული განვითარებისა და ინფრასტრუქტურის სამინისტროს უწყებების მიერ უშუალოდ განხორციელებული პროექტების გარდა, რეგიონის რვავე მუნიციპალიტეტმა მოცულობითი პროექტების დაწყება შეძლო. ჯამში, რეგიონულ ჭრილში, 160 მილიონ ლარზე მეტი ღირებულების 990-მდე პროექტი დაიგეგმა რეგიონებში განსახორციელებელი პროექტების ფონდის, საპილოტე რეგიონების ინტეგრირებული განვითარების პროგრამის, სოფლის მხარდაჭერის, სკოლების მცირე სარეაბილიტაციო სამუშაოების, სტიქიის ლიკვიდაციის, მთის ფონდის და ადგილობრივი ბიუჯეტის ფარგლებში.
2022 წლის ბიუჯეტის ფარგლებში, უშუალოდ მუნიციპალიტეტების მიერ, დაიგო და მოწესრიგდა 115 კმ-დე გზა, მცირე და ნაწილობრივი სამუშაოები განხორციელდა 57-მდე საბავშვო ბაღში, მოეწყო და რეაბილიტირდა 100-მდე სპორტული ადგილი, მათ შორისაა 70-მდე მინი სპორტული მოედანი, განახლდა და მოეწყო 50-მდე რეკრეაციული არეალი, მცირე და ნაწილობრივი სამუშაოები განხორციელდა 18-მდე საჯარო სკოლაში. ჩატარდა წყალმომარაგების, ტურისტული ინფრასტრუქტურის, სოფლებში ამბულატორიების რეაბილიტაციის სამუშაოებიც.
ამ ეტაპზე, პირველადი დაფინანსების ფარგლებში, რეგფონდში მუნიციპალიტეტების მიერ 39 მილიონ ლარზე მეტი ღირებულების 75 პროექტია დაგეგმილი 2023 წელს, რაც ეტაპობრივად გაიზრდება როგორც ადგილობრივი ბიუჯეტის ფარგლებში დაგეგმილი პროექტებით, ასევე, სხვადასხვა ფონდებიდან მოზიდული დაფინანსებით.
,,მომავალ წელს კახეთის რეგიონში ინფრასტრუქტურული პროექტები უფრო მასშტაბურ ხასიათს შეიძენს, კერძოდ დაგეგმილია როგორც საგზაო ინფრასტრუქტურული სამუშაოები, ჩქაროსნული მაგისტრალების მშენებლობა, ასევე შემოვლითი დამაკავშირებელი გზის მშენებლობა-რეაბილიტაცია. იგეგმება საგანმანათლებლო ინფრასტრუქტურის მოწყობა, ბაღების რეაბილიტაცია-მშენებლობა, აქტიურ ფაზაში შევა ცენტრალური და მინი სტადიონების მოწყობა რეგიონში“-განაცხადა კახეთის სახელმწიფო რწმუნებულმა გიორგი ალადაშვილმა.
